حڪيم دين محمد ’اڪرم ٻورڙائي‘

حڪيم دين محمد ’اڪرم ٻورڙائي‘: شاعر، حڪيم ۽ ڊراما نويس دين محمد ولد امام بخش خان جوڻيجي 25 فيبروري 1936ع تي ڳوٺ ٻورڙي، تعلقي خيرپور ناٿن شاهه، ضلعي دادوءَ ۾ جنم ورتو. سندس ادبي نالو ’اڪرم ٻورڙائي‘ هو. 1954ع ۾ دادوءَ مان استاد شفيع محمد سولنگي جي نگرانيءَ ۾ سنڌي فائنل پاس ڪيو. حڪمت جي سکيا هن پنھنجي ڀاءُ ڪريم بخش خان کان ورتي. دادو ۾ رهڻ دوران ’انجمن آفتاب ادب دادو‘ سان سلھاڙجي ويو ۽ حافظ محمد احسن چنا جي شاگرديءَ ۾ رهي شاعري جي سکيا ورتي. هن 1963ع ۾ ڳوٺ ٻورڙي ۾ ’بزم فدا‘ جو بنياد وڌو، جتي ادب ۽ راڳ جون محفلون، اسٽيج ڊراما ۽ والي بال ٽورنامينٽ ڪرائيندو رهيو. پاڻ والي بال جو سٺو رانديگر هو. ڳوٺ ۾ والي بال ڪلب جو بنياد پڻ وڌو. هن پنھنجي لکيل ڊرامي ’هاري جي پڪار‘، ’احمد خان ثنائي‘ جي ڊرامن ’فقير بادشاهه‘ ۽ ’دريا شاهه جو آندو مون کِيرو پلو‘، حڪيم محمد اشرف جوڻيجي جي ڊرامن ’قرباني‘، ’وفادار محبوب‘ ۽ ’سنگدل محبوب‘ سميت ٻين ۾ ڪردار ادا ڪيو ۽ انھن جا گانا به لکيا. 1970ع ۾ ڪوٽڙي لڏي آيو، جتي ’مھراڻ والي بال ڪلب‘ ڪوٽڙي جي پليٽ فارم تان آل سنڌ ۽ آل پاڪستان والي بال ٽورنامينٽ ڪرائيندو رهيو. ’بزم ادب‘، ڪوٽڙي جو صدر، بزم روح رهاڻ ۽ سنڌي ادبي سنگت جو ميمبر ۽ ’الذاڪرين تنظيم‘ ڪوٽڙي جو سرپرست اعليٰ به رهيو. روزگار جي حوالي سان تپيدار، سينئر اڪائونٽنٽ (بورڊ آف روينيو) ۽ حڪمت سان وابسته رهيو. سندس نعتون چوٿين ۽ پنجين درجي جي سنڌي نصاب ۾ شامل آهن. سندس ڇپيل ڪتابن ۾: ’اکيون پسي آيون‘ (1983ع)، ’سندي سڪ پرين‘ (نعتيه ديوان- 2003ع)، ’جيڏو تنھنجو نانءُ‘ (حمديه ديوان- 2004ع)، ’سڄڻ نت سوجهرا‘ (منقبت ديوان- 2005ع)، ’نائي نيڻ نھار‘ (عشقيه ديوان- 2006ع)، ’نسورو ئي نور‘ (نعتيه غزل- 2007ع) ۽ ’هينئڙي سڄڻ ساريا‘ (نعتيه غزل- 2008ع) رباعيات اڪرم شامل آهن. 30 آڪٽوبر 2009ع تي ڪوٽڙي ۾ وفات ڪئي. سندس نالي سان سنڌالاجي ڄامشوري ۾ ڪتابن جو ڪارنر قائم ٿيل آهي.

داخلا ۾ استعمال ٿيل تاريخون

1936.02.25  عيسوي

شاعر، حڪيم ۽ ڊراما نويس دين محمد ولد امام بخش خان جوڻيجي 25 فيبروري 1936ع تي ڳوٺ ٻورڙي، تعلقي خيرپور ناٿن شاهه، ضلعي دادوءَ ۾ جنم ورتو.

2009.10.30  عيسوي

حڪيم دين محمد 30 آڪٽوبر 2009ع تي ڪوٽڙي ۾ وفات ڪئي.

شاعر - ڀاڱي جون ٻِيون داخلائون